Apat na Dekada ng Demokrasya: Pakikiisa at Paggunita ng Ika-40 Anibersaryo ng EDSA People Power Revolution sa Paaralan ng Manresa

"Ang tunay na kapangyarihan ng mamamayan ay hindi nagtatapos sa kalsada; ito ay nagpapatuloy sa ating pang-araw-araw na pagpili sa tama at makatarungan."

Sa paglalayong sariwain ang diwa ng pagkakaisa at kalayaan, ipinagdiwang ng komunidad ng Manresa School ang ika-40 anibersaryo ng EDSA People Power Revolution na may temang “EDSA KWARENTA: Alay ng Pagkakaisa at Pag-asa. Sa pamamagitan ng serye ng mga makabuluhang gawain, muling binigyang-buhay ng mga mag-aaral at guro ang mga aral ng mapayapang pakikibaka na nagpabago sa kasaysayan ng Pilipinas. Ang makabuluhang pagdiriwang na ito ay matagumpay na naisakatuparan sa ilalim ng pamumuno ng Kagawaran ng Araling Panlipunan, katuwang ang mga guro mula sa SHS Humanities and Social Sciences (HUMSS).

Binuksan ang programa sa pamamagitan ng isang makabuluhang mensahe mula kay G. Emson Petilla, ang Ikalawang Punong-Guro ng Senior High School (SHS). Sa kanyang pananalita, binigyang-diin ni ginoong Petilla ang hindi matatawarang kahalagahan ng kasaysayan at ang mga aral ng EDSA People Power Revolution. Paalala niya, ang pag-unawa sa ating nakaraan ay ang nagsisilbing gabay sa pagbuo ng isang matatag at demokratikong kinabukasan.

Ipinagpatuloy ang paggunita sa pamamagitan ng pagpaparating ng mensahe ng EDSA gamit ang musika. Sa bawat liriko ng awit at makabayang kanta na itinanghal, muling naramdaman ang alab ng pagmamahal sa bayan. Ang mga himig na ito ay nagsilbing paalala na ang sining ay isang makapangyarihang sandata sa pagpapahayag ng katotohanan.

Upang mas mapalalim ang kaalaman ng mga kabataan, idinaos ang isang Trivia Quiz (Pagbabalik-tanaw sa Katotohanan) tungkol sa mga mahahalagang pangyayari noong Pebrero 1986. Sa gawaing ito, hindi lamang bilis ng isip ang ipinamalas ng mga mag-aaral, kundi ang kanilang pagpapahalaga sa katotohanan ng kasaysayan sa gitna ng mga hamon ng makabagong panahon.

Nagbigay din ng kanilang makabuluhang saloobin ang mga guro mula sa JHS at SHS. Binigyang-diin sa kanilang mga mensahe ang kahalagahan ng pagsasabuhay sa tunay na aral ng EDSA—ang paninindigan para sa hustisya, paggalang sa karapatang pantao, at ang patuloy na pagbabantay sa ating demokrasya bilang mga responsableng mamamayan.

Ayon sa mga guro, ang EDSA ay hindi lamang isang pahina sa libro ng kasaysayan, kundi isang hamon sa bawat "Manresan" na maging liwanag at boses ng katotohanan sa loob at labas ng paaralan. Ang aktibong pakikilahok ng mga mag-aaral ay patunay na ang kabataan ang magpapatuloy ng sulo ng kalayaan na sinimulan apat na dekada na ang nakalilipas.

Isinulat ni: Bb. Marjorie Grefal / Mga Kuhang Larawan ni: Bb. CJ Sapao